Nien Boom
– Torso oder jungen Boom? – stünn över enen Bidrag in „Unser Travemünde“ Heft 1/1993. Dorin güng dat üm den Boomstamm vun de grote Ulm in den Goorn vun unsen Lüchtturm. Den groten Boom vun dat Tramünner Wohrteken – Lüchtturm, Lüchtturmwärterhuus un Boom – .
De Ulm weer dormals vun den Ulmensplittkäver grulich tosett woorn. So grulich, dat de sworen Telgen afsaagt warrn müssen. Överbleven weer en nich goot antosehen, nakelten Boomstamm. För een de den groten Boom noch kennt hett, wohrhaftig keen Bild to‘n freuen. Dormit de nakelte Boomstamm en beter Bild afgeven sull, hett man 5 Clematis üm em plant. De sullen an em hochranken un den nakelten Stamm afdecken.
Na enige Johren hett sik de Natur klöker wiest as de Lüüd, de den schetterigen Stamm partu erhollen wullen. Wohrschienlich hett de Ulmensplittkäver sin Wark to End bröcht. In’n Oktober 2005 weer dat so wiet. De dörch un dörch morsche Boomstamm is vun sülven ümfullen. Dat hett woll bi männich Lüüd en lang Gesicht geven.
För Tramünn is dat en Glück, dat wi en rührig Handwarkergemeeschap hebbt. De Handwarkers hebbt seggt, dor höört en nien Boom hen. Se hebt den ümfullen Boomstamm uteneen sagt un dat Holt afföhrt. Ok hebbt se dorför sorgt, dat dor en nien Boom, en Linn, anplant worrn is.
To höpen is, dat de junge Linn goot un snell wassen deiht, dormit in en poor Johren dat Tramünner Wohrteken, – Lüchttorm, Lüchttormwärterhuus un Boom – wedder to Hoop is.
Rolf Schwippert
Unser Travemünde, 2006, Heft 4/329