Dorsch

Rieken Fischfang!

Fröh an Moorn bi Sünnenupgang keem en Fischkutter vun See. Dat Krieschen un Larmen vun de Möven möök em al vun wieden künnig. He böög vör Tramünn üm de Mool un föhr in Richtung Fischereehaven. Seker harr de Kutter enen goden un rieken Fang maakt.

Fischkutter

Dat weer Döschtiet! Al up de Trüchfohrt wöörn de Fisch sorteert un sauber maakt un de Bifang un Resten över Bord smeten. Dat weer en lekker Freten för de Möven. Se flögen in dichten Swarm achter den Kutter ran un töövten up niege Fischresten. In de Hööcht vun de Passsat smeten de Fischer wedder wat över Bord. Alltohhop un to glieke Tiet störk de Mövenswarm hindaal un möök sik doröver her.

Fischkutter

Ünner luthals Krieschen geev dat Striet üm de dicksten Brocken. Dat Water sprütt richtig hoch. Dorna stööv de Swarm uteenanner un dat güng wieder, ümmer den Kutter achterna.

Mövenschwarm hinter dem Fischkutter

För mi heest dat: „Föhr man gau na den Fischereehaven un kööp Fisch in. Hüüt kriggst du seker enen goden Dösch!/. So’n frischen Dösch weer för uns en Festeten. Ok an Hilligavend keem bi uns ümmer Dösch up den Disch un keen Karpen.

Fischkutter

Fröher weer de Dösch billiger as de Karpen un ok nich so fett. Wi kunnen em eenfach beter verdregen un he smeckt uns ok beter. Hüdigendaags is de Dösch dürer as de Karpen. Wenn man Glück hett, kriggt man dat Kilo Dösch för 5 Euro. Dat Kilo Karpen kannst al för 4 bit 5 Euro köpen. He is billiger as de Dösch. De Snack: „De Dösch is de Karpen vun den lütten Mann!“ gellt dorüm egentlich nich mehr.

Text und Fotos: Antje Heßler
Unser Travemünde, 2012, Heft 4/352

zurück zur Übersichtsseite Platt