Badewanneneffekt!
Mal kümmt de Storm ut Süüdwest un mal ut Noordoost!
Kümmt he ut Süüdwest, heet dat bi uns in Schleswig-Holsteen för de Noordseeküst oftins Stormfloot.
An de Oostseeküst is denn kuum noch Water. Överall kaamt Sandbänk to’n Vörschien ok ünner de Seebrüchen.
De staht denn up hoge Stelzen. De Lüüd köönt ünnerdörch gahn. Welk föhrt sogor mit Fohrrad ünner de Brüch lang.
Dat is en dulles Beleevnis! Dat bringt de Storm ut Süüdwest tostann. He drückt dat Water in den finnischen Meerbusen.
So weer dat ok in’t letzt Johr. De Wederbericht geev ümmer wedder Stormflootwarnung vör de Weestküst dörch.
Achterna keem denn en Satz vun unsen Wedermann Meno Schrader: „Und an der Ostseeküste ist niedrig Wasser! Mindestens 1½ Meter unter normal. Viele Fähren mussten den Betrieb einstellen!“
En Dag later geev dat ümmer noch Stormflootwarnung för de Weestküst. Aver achterna keem denn de Warnung för de Oostseeküst: „Für die Ostseeküste ist Hochwasser angesagt und es besteht die Gefahr einer Sturmflut durch den Badewanneneffekt!“
Dat vun den Storm in den finnischen Meerbusen rinndrückte Water swappte torüch. Ahn groten Storm keem dat Water nu in de Lübecker Bucht. 1½ Meter över normal wöörn anseggt. Vun de Parkplätz in Waterneegde müssen de Autos in Sicherheit bröcht warrn.
So gau ännert sik dat Weder.
Text und Fotos: Antje Heßler
Unser Travemünde, 2016, Heft 1/365